கோவையில் சங்கனூர் ஓடை தூர்வாரும் பணி தொடங்கியது.. மக்கள் மகிழ்ச்சி

கோவை மேட்டுப்பாளையம் சாலையில் உள்ள சங்கனூர் ஓடை நீண்ட வருடங்களாக புதர் மண்டி தண்ணீர் செல்ல வழியில்லாமல் கிடந்தது. தற்போது முதல்வர் மு.க.ஸ்டாலின் இதனை தூர் வார நிதி ஒதுக்கியதை அடுத்து பொக்லின் இயந்திரம் மூலமாக தூர்வாரும் பணி நடைபெற்று வருகிறது. மேட்டுப்பாளையம் ரோட்டில், கவுண்டம்பாளையம் எருக்கம்பெனி அருகே துவங்கும் சங்கனுார் ஓடை, ரத்தினபுரி, ஜி.பி.சிக்னல், பாப்பநாயக்கன்பாளையம், இந்துஸ்தான் கல்லுாரி, மீனா எஸ்டேட், ஸ்டாக் எக்சேஞ்ச் வழியாக, சிங்காநல்லுார் குளம் அருகே, நொய்யல் ஆற்றில் கலக்கிறது. சங்கனுார் ஓடையை துார்வாரி, அரைவட்டச் சாலை ஏற்படுத்தினால், பிரதான ரோடுகளில் போக்குவரத்து நெரிசல் குறையும் என்பதால், தி.மு.க., ஆட்சிக்கு வந்ததும், அத்திட்டத்துக்கு துாசி தட்டப்பட்டது.முதல்கட்டமாக, ரூ.49 கோடியில் மேட்டுப்பாளையம் ரோட்டில் இருந்து சத்தி ரோடு வரை, பணிகள் மேற்கொள்ள முடிவு செய்யப்பட்டுள்ளது. இத்திட்டத்தை, கோவையில் நடந்த விழாவில், தமிழக முதல்வர் ஸ்டாலின் துவக்கி வைத்தார். இதைத்தொடர்ந்து, ஓடையை துார்வாரும் பணியை, மாநகராட்சி நேற்று முன்தினம் துவக்கியது. டையின் தரைத்தளத்தில் கருங்கற்கள் பதிக்கப்படுகின்றன. முட்செடி வளர வாய்ப்பிருப்பதாலும், கழிவு மண் அள்ள முடியாத சூழல் ஏற்படும் என்பதாலும், 4 இன்ச் உயரத்துக்கு கான்கிரீட் கலவை ஊற்றுவதற்கு ஆலோசனை நடந்து வருகிறது. ஓடை கரையின் இருபுறமும் கான்கிரீட் தடுப்புச்சுவர், கரையில் நடைபாதையுடன் சாலை வசதி ஏற்படுத்த, முடிவு செய்யப்பட்டிருக்கிறது.