கோவையில் 2-ம் தவணை தடுப்பூசி செலுத்திக்கொள்ளாதவர்களை கணக்கெடுத்து தடுப்பூசி செலுத்த சுகாதாரத்துறை நடவடிக்கை

கோவையில் அரசு மருத்துவமனைகளில் செயல்படும் 24 மணி நேர தடுப்பூசி மையங்கள், மெகா கரோனா தடுப்பூசி முகாம்கள் என தொடர்ந்து தடுப்பூசி செலுத்தும் பணி நடைபெற்று வருகிறது. இதில், முதல் தவணை தடுப்பூசி செலுத்திய பிறகு இரண்டாம் தவணை செலுத்த பலர் முன்வரவில்லை. இதுதொடர்பாக, சுகாதாரத்துறையினர் கூறியதாவது: கோவையில் 18 வயதுக்கு மேற்பட்டவர்களில் இதுவரை 91 சதவீதம் பேருக்கு முதல்தவணை தடுப்பூசி செலுத்தப்பட்டுள்ளது. 55 சதவீதம் பேர் இரண்டாம் தவணை தடுப்பூசி செலுத்திக்கொண்டுள்ளனர். முதல்தவணை தடுப்பூசி செலுத்தி இரண்டாம் தவணை செலுத்தாதவர்கள் சுமார் 5 லட்சம் பேர் உள்ளனர். இதில், சிலர் ஒரு தவணை தடுப்பூசி செலுத்திக்கொண்டால் போதும் என்ற மனநிலையில் உள்ளனர். தொற்று பாதிப்பு எண்ணிக்கை குறைந்துள்ளதால், மக்களிடையே பயம் இல்லை. தற்போது முகக்கவசம் அணியும் பழக்கமும் குறைந்து வருகிறது. எனவே, இரண்டு தவணை தடுப்பூசி செலுத்திக்கொண்டால்தான் முழு பாதுகாப்பை பெற முடியும் என விழிப்புணர்வை ஏற்படுத்தி வருகிறோம். எங்களிடம் முதல்தவணை தடுப்பூசி செலுத்தி, இரண்டாவது தவணை செலுத்திக்கொள்ளாதவர்களின் பட்டியல் உள்ளது. அந்த பட்டியலை ஆரம்ப சுகாதார நிலையங்கள் வாரியாக பிரித்து அனுப்பியுள்ளோம். அங்கிருந்து செல்போன் மூலம் தடுப்பூசி செலுத்திக்கொள்ள வருமாறு அழைப்பு விடுக்கப்பட்டு வருகிறது. பொதுமக்களுக்கு எளிதில் இரண்டாம் தவணை தடுப்பூசி கிடைக்க வேண்டும் என்பதற்காக, 84 நாட்களுக்கு முன் எந்த இடத்தில் முகாம் அமைத்தோமோ அங்கேயே மீண்டும் முகாம் அமைத்து வருகிறோம். ஊராட்சிகள் மூலம் வீடுதோறும் சென்று இதுவரை தடுப்பூசி செலுத்திக்கொள்ளாதவர்களுக்கு தடுப்பூசி செலுத்தும் பணியும் நடைபெற்று வருகிறது. முகாமுக்கு வரமுடியாதவர்கள் இதில் பயனடைந்து வருகின்றனர். இவ்வாறு அவர்கள் கூறினர்.