கோவை டூ கேரளா... ரெண்டு வருஷத்துக்கு பிறகு பஸ் பயணிகள் ஹேப்பி!

கோவையிலிருந்து கேரளாவுக்கு கிட்டதட்ட இரண்டு ஆண்டுகளுக்கு பிறகு இன்று முதல் பேருந்துகள் மீண்டும் இயக்கப்படுகின்றன. கோவை- கேரளா போக்குவரத்து மீண்டும் தொடக்கம் கொரோனா நோய்த்தொற்று காரணமாக கடந்த 21 மாதங்களாக உக்கடம் பேருந்து நிலையத்தில் இருந்து கேரளா செல்லும் அனைத்து பயணிகள் பேருந்தும் ரத்து செய்யப்பட்டிருந்தன. இந்த நிலையில் இன்று காலை முதல் பாலக்காடு, திருச்சூர், கொச்சின், மூணாறு உள்ளிட்ட பல்வேறு பகுதிகளுக்கு பயணிகள் பேருந்துகள் மீண்டும் இயக்கப்படுகின்றன. இதனால் பொதுமக்கள் மகிழ்ச்சி அடைந்துள்ளனர். கொரோனா பொதுமுடக்க தளர்வு காலத்தில் அதிகமான பயணிகள் ரயிலில் மட்டுமே பயணம் செய்த நிலையில், தற்போது பேருந்துகள் இயக்கப்படுவதால் தமிழக- கேரள எல்லை மாவட்டங்களின் பயணிகள் மகிழ்ச்சியடைந்துள்ளனர். இதுகுறித்து கோவை மாவட்ட ஆட்சியர் சமீரன் கூறும்போது, 'பேருந்தில் பயணம் மேற்கொள்பவர்கள் கண்டிப்பாக முகக்கவசம் அணிய வேண்டும். சனிடைசர் கொண்டு கைகளை நன்றாக கழுவ வேண்டும். அத்துடன் பயணிகள் கண்டிப்பாக இரண்டு தவணை கொரோனா தடுப்பூசி போட்டிருக்க வேண்டும். ஆர்டிசிபிஆர் சான்றிதழ் வைத்திருக்க வேண்டும். கோவை -கேரள எல்லையான வாலையார் பகுதிகளில் முகாம் அமைத்து அங்கு வரும் நான்கு சக்கர வாகனங்கள் உள்ளிட்டவை கடுமையாக சோதிக்கப்பட்ட பிறகே கோவைக்குள் அனுமதிக்கப்படும்' என்று ஆட்சியர் சமீரன் கூறியுள்ளார்.