முதலிடத்திலிருந்த கோவை - தூய்மை நகரம் பட்டியலில் இந்த ஆண்டு 2-வது இடம்

தூய்மை நகரங்களின் தரவரிசை பட்டியலில் கடந்தாண்டு, தமிழக அளவில் முதலிடம் பிடித்த கோவை மாநகராட்சி, இந்த ஆண்டு இரண்டாமிடத்துக்குப் பின்தங்கியுள்ளது. மத்திய வீட்டு வசதி மற்றும் நகர்ப்புற மேம்பாட்டு அமைச்சகத்தின் கீழ், 2016 ல், 'தூய்மை பாரதம்' இயக்கம் துவக்கப்பட்டது. ஆண்டுதோறும் மக்களிடம் கருத்து, கள ஆய்வுகள் அடிப்படையில் நாடு முழுவதும் தூய்மை நகரங்கள் தர வரிசைப்படுத்தப்படுகின்றன. இதற்கென, சேவை, தூய்மை, தொழில்நுட்பம் உள்ளிட்ட பல்வேறு பிரிவுகளின் 6,000 மதிப்பெண்களுக்குக் கணக்கிடப்பட்டு, 'ரேங்க்' வழங்கப்படுகிறது. இவ்வாண்டுக்கான 'ரேங்க்' பட்டியல் தற்போது வெளியாகியுள்ளது. தேசிய அளவில் இந்தூர் (மத்திய பிரதேசம்) 5618.14 மதிப்பெண்கள் பெற்று முதலிடத்தைத் தக்கவைத்துள்ளது. சூரத் நகர் (குஜராத்), 5559.21 பெற்று இரண்டாமிடம், விஜயவாடா (ஆந்திரா), 5368.37 பெற்று மூன்றாமிடம் பெற்றுள்ளது. இவ்வரிசையில், 6,000க்கு, 2781.23 மதிப்பெண்களுடன் தமிழகத்தில் சென்னை முதலிடமும், தேசிய அளவில், 43வது இடமும் பிடித்துள்ளது. கோவை, 2308.41 மதிப்பெண்களுடன் தேசிய அளவில், 46வது இடமும், தமிழகத்தில் இரண்டாம் இடமும் பெற்றுள்ளது. மதுரை, 2207.59 மதிப்பெண்களுடன், 47வது இடமும், தமிழகத்தில் மூன்றாம் இடமும் பிடித்துள்ளது. கடந்தாண்டு, 2,337.11 மதிப்பெண் எடுத்து, கோவை மாநகராட்சி தேசிய அளவில், 40வது 'ரேங்க்' பெற்றது; தமிழக அளவில் முதலிடம் பெற்றது குறிப்பிடத்தக்கது. செய்தியாளர்: க.ராஜ்குமார்-கோவை